បាល់ទាត់៖ រឿងរ៉ាវផ្ទេរកីឡាករ Cristiano Ronaldo ទៅកាន់ក្លិបមេឃខៀវ Manchester City កាន់តែឡើងកំដៅក្តៅគគុក ស្របពេលដែលអ្នកគាំទ្រជាច្រើនជាពិសេសអ្នកគាំទ្ររបស់ Manchester United ហាក់សំដែងការខកចិត្តខ្លាំង ជុំវិញដំណឹងនេះដែលប្រភពធំៗជាច្រើនអះអាងថា កិច្ចចរចាសម្រេចសឹងតែ ៩៥ភាគរយទៅហើយ។

សេចក្តីរាយការណ៍ចុងក្រោយបង្អស់បានឱ្យដឹងថា កិច្ចចរចាទំនងជានឹងកាន់តែខិតជិតចេញជារូបរាងផ្លូវការហើយ ក្រោយពីគេដឹងថា Ronaldo បានប្រមូលសម្ភារៈផ្ទាល់ខ្លួនចេញពីទូផ្ទុកឥវ៉ាន់ផ្ទាល់ខ្លួន ដោយបានប្រាប់ទៅកាន់ក្លិបយក្សអ៊ីតាលីនេះថា គេគ្មានបំណងចង់បន្តអាជីពនៅ Serie A បន្តទៀតឡើយ។

ដោយឡែក បើយោងតាមសារព័ត៌មានអង់គ្លេស Sky Sport បានបញ្ជាក់បន្ថែមថា Ronaldo នឹងមិនមានវត្តមានជាមួយ Juventus សម្រាប់ការប្រកួតទល់នឹង Empoli សម្រាប់ចុងសប្តាហ៍នេះឡើយ បន្ទាប់ពីដំណឹងផ្ទេរទៅកាន់ Man City កាន់តែលេចឡើងផ្ទួនៗ។

គួរដឹងដែរថា ដំណឹងនៃការចរចានាំយក Ronaldo ទៅកាន់ទីក្រុង Manchester សាជាថ្មីនេះបានកើតឡើង ក្រោយពេលដែលលោក Pep Guardiola ក៏ដូចជាក្លិប Manchester City បានបរាជ័យក្នុងការនាំយក Harry Kane មកបំពេញតំបន់ប្រយុទ្ធ ខណៈការចាកចេញរបស់ Sergio Aguero ទៅកាន់ Barcelona នៅតែមិនទាន់មានអ្នកជំនួសតំណែងរបស់គេបានសមស្របនៅឡើយ។

ប្រភពកន្លងមកបានអះអាងថា Man City បានដាក់សំណើរ ២៥លានផោនទៅកាន់ Juventus រួមជាមួយប្រាក់ឈ្នួលប្រមាណ ២៥ម៉ឺនផោនក្នុងមួយសប្តាហ៍សម្រាប់កីឡាករប្រធានក្រុមជម្រើសជាតិព័រទុយហ្គាល់នេះ៕